Despois da denuncia conxunta da plataforma unitaria sobre o ninguneo institucional do Director Xeral, dende UGT facilitamos un resumo técnico e pormenorizado do resto de asuntos tratados na reunión.
Como xa vén sendo habitual na política de feitos consumados da Dirección Xeral de Xustiza (DXX), estes encontros carecen de marxe real para decidir: a administración limítase a dar información con todo xa cociñado de antemán, sen escoitar os traballadores e traballadoras.
O Director Xeral fixo unha valoración fóra da realidade, cualificando de "positiva" a situación actual e afirmando que a implantación do novo modelo evoluciona "mellor do previsto". Segundo os seus datos —non documentados nin achegados—, apenas hai unha diminución da produtividade.
Malia o seu triunfalismo, o Director Xeral trasladou as dificultades atopadas pola Xunta que dificultaron a implantación do novo modelo dende o 1 de xaneiro:
- A excesiva mobilidade do persoal.
- O atraso tecnolóxico crónico das Oficinas de Xustiza Municipais.
- As disfuncións da Disposición Transitoria 4ª sobre a ampliación de competencias en materia de Violencia sobre a Muller (VSM).
- O caos derivado da desaparición do Xulgado de Instrución Nº 8 da Coruña e de Vigo para transformarse en seccións de VSM, así como a criação das seccións comarcalizadas de VSM en Santiago e Ourense.
- O mal funcionamento xeneralizado das aplicacións do Ministerio de Xustiza a data 31/12/25 (Lexnet, SIRAJ, REAX e PNJ).
1. PERSOAL, BOLSAS E TELETRABALLO
- Nova Bolsa de Persoal Interino: Presentáronse preto de 3.800 instancias. A previsión da Administración é publicar as listaxes provisionais ao longo do mes de agosto.
- Pago de vacacións ao persoal interino: á pregunta sobre o motivo polo cal non se está aboando as vacacións aos interinos, a DXX contestou que as vacacións hai que desfrutalas porque hai sentenzas nese senso.
- Criterio Restritivo de Ceses: Ante a demanda de UGT de que non se debe cesar ao persoal interino ata que a praza sexa ocupada de xeito efectivo, a DXX manifesta que o cese materialízase no momento en que se coñece a causa (xubilacións, substitucións, etc.), sen agardar á incorporación efectiva do novo titular, dado que agora os nomeamentos están ligados á RPT. Así mesmo, o prazo máximo de tres anos para interinos computarase estritamente dende a entrada en vigor da nova orde.
- Exclusións na Bolsa: O persoal interino que aprobe a oposición e pretenda solicitar unha excedencia por interese particular para continuar nas bolsas, será excluído delas, xa que a orde reguladora non permite esta opción.
- Atrasos nos Nomeamentos: A Administración xustifica a tardanza administrativa baixo o argumento de que necesitan manter persoal dispoñible en reserva para cubrir posibles urxencias.
- Parálise do Teletraballo: O Director Xeral confirmou que o borrador que estaba practicamente perfilado quedou sen efecto tras a entrada do novo modelo organizativo da Oficina Xudicial. Teñen que redactar un texto totalmente novo dende o principio, deixando este dereito paralizado e sen calendario. Segundo informou o Director Xeral, non poderá dar una data concreta ata que a situación estea estabilizada e ata que se suavice a crispación existente.
2. INFRAESTRUTURAS, ESPAZOS E SAÚDE LABORAL
- Modernización da Sinaléctica: A DXX informou de que a sinalización exterior dos novos Tribunais de Instancia xa está rematada, pero a interior segue pendente de licitación e por posibles cambios de espazos. Pretenden implantar pantallas informativas, aplicacións móbiles con acceso intuitivo e melloras de accesibilidade para persoas con discapacidade.
- Caos en Teléfonos e Correos Electrónicos: Admitiron que están a traballar en todas as cidades para implementar cambios nas liñas de teléfono (probablemente mediante centralita) e nos correos electrónicos. O problema é que recoñecen que aínda non saben como materializalo, lo que demostra o nivel de improvisación do proxecto.
- A "Solución" do Aire Acondicionado: Fronte ás queixas por temperaturas extremas, a DXX limítase a incluír melloras nos edificios onde hai informes de eficiencia enerxética en marcha. Para o resto, a solución habitualmente adoptada é o envío de aparellos portátiles ("pingüinos"), como xa ocurre en Lugo, Vilalba e Sarria. En Lugo fálase dunha substitución integral de maquinaria aínda sen executar.
- Parálise no Comité de Seguridade e Saúde: Continúa sen data de convocatoria polo atraso na finalización de diversos informes técnicos.
- Medición do Gas Radón: A DXX admitiu ter os datos das medicións en varios edificios xudiciais, pero sen concretar ningunha medición, limitándose a afirmar que os niveis "non son alarmantes". Está pendentes de comparar las medicións obtidas cos parámetros permitidos.
- Adecuación de Espazos en Cidades:
- Vigo: Uso da 3ªplanta
- Santiago: Valorando a ampliación da 2ª planta.
- Pontevedra: Apertura da cuarta planta para trasladar a área de execución.
- A Coruña: Presenta retrasos significativos debido á falta de conformidade no informe emitido polos Letrados da Administración de Xustiza (LAX).
- Caldas de Reis: Prevista unha renovación integral do edificio baixo criterios de eficiencia enerxética.
3. IMPLANTACIÓN TECNOLÓXICA: CRONOGRAMA ATENEA
- Fin de Minerva: O sistema de xestión procesual Minerva deixará de estar operativo definitivamente o 28 de febreiro de 2027.
- Calendario de ATENEA: Malia prometerse para o mes de maio-xuño, o despregamento atrasase ata finais de ano. Prevese unha proba piloto en outubro de 2026 e a implantación da numeración única para os Tribunais de Instancia en 2027 (independentemente da xurisdición). Actualmente están á espera de asinar o segundo convenio de cesión para adquirir as ferramentas tecnolóxicas necesarias.
- Versión en Galego: Confirmouse que a aplicación informática contará finalmente cunha versión en lingua galega.
4. RECORTES EN PERMISOS, FORMACIÓN E RETRIBUCIÓNS
- Recortes Económicos en Baixas (IT): A Administración confirmou rotundamente que non vai aboar a traxectoria profesional que se devengue durante os períodos de baixa laboral, escudándose nunha aplicación estrita e lesiva da regulación vixente.
- Asistencia a Exames de Galego: A DXX négase a considerar estas probas como un exame final. Manterán o criterio restritivo de conceder unicamente as horas xustas para o desprazamento e a realización do exame, recortando a xornada de permiso.
- Negativa á Formación: A DXX rexeitou taxativamente conceder cursos de formación específicos para xefaturas e para o persoal interino de nova incorporación, considerando que a autoformación en liña e as prolongacións de xornada xa son suficientes. UGT manifestou a súa oposición e exixiu a formación sempre que haxa un cambio de destino para o que non se teña experiencia previa.
5. OUTRAS PROBLEMÁTICAS TRATADAS
- Audiencias Provinciais e Menores: Confirmouse que hai propostas para que a tramitación e execución da Audiencia Provincial de Pontevedra e a de A Coruña pase a ser asumida pola Audiencia. Este modelo non se aplicará, polo de agora, nin en Ourense, nin en Lugo, nin no TSXG. En materia de Menores tamén hai unha proposta para que leven tramitación e execución.
- Prazas xudiciais: nun primeiro momento valorouse a creación de 19 prazas xudiciais en Galicia pero posteriormente o Ministerio solicitou un segundo informe ó CGPJ para que lle trasladese qué prazas considera prioritarias, non puidendo asegurar que finalmente sexan creadas 19 prazas.
- Prazas de Fiscais: Existe un proxecto de decreto para crear 7 prazas de fiscais en Galicia, aínda que a Administración recoñece que quedan desatendidas as necesidades urxentes de Ferrol e Pontevedra.
- Gardas en Vigo: A DXX comprometeuse a "estudar" a problemática do cobro das gardas semanais e de LEIS nas prazas de instrución de Vigo.
- Xornada de Verán: A ampliación do horario estival e adaptación da xornada á nova regulación da Administración Xeral do Estado, segue pendente de que o Ministerio de Xustiza adapte a súa Orde.
- Concurso de Traslado: O Ministerio aínda nin sequera solicitou á comunidade autónoma a remisión das prazas vacantes.
6. ROGOS E PREGUNTAS
UGT afeou á DXX a falta de vontade negociadora sufrida nos últimos meses. Reiterou a urxencia de cubrir todas as prazas desocupadas á maior brevedade posible. Lembrámoslle á obriga de cumprir coa disposición transitoria primeira do Regulamento 1451/2005. Demandamos a necesidade dunha maior transparencia na adxudicación de sustitucións. Exisimos que o portasinaturas permita recuperar os documentos enviados a firma cando hai un erro, mais a DXX comunicou que xa no se farán modificacións nas aplicacións ata a implantación de ATENEA. Insistimos na necesidade de crear unha comisión de traballo integrada polas organizacións sindicais, a DXX e os Letrados con postos de dirección.