UGT JUSTICIA INFORMA
CAOS E COLAPSO DOS TRIBUNAIS DE INSTANCIA
Os sindicatos SPJ-USO, STAJ, UGT, CSIF e CCOO, comparecemos de xeito conxunto o xoves 18 de xuño nunha rolda de prensa para alertar sobre a grave situación de deterioro e colapso que atravesa a Administración de Xustiza en Galicia a raíz da implantación dos tribunais de instancia e a aplicación da chamada Lei de Eficiencia.
A improvisación da Dirección Xeral de Xustiza, a falta de diálogo social e a ausencia dos medios humanos e materiais necesarios están a provocar un deterioro sen precedentes do servizo público de Xustiza, con graves consecuencias tanto para o persoal como para a cidadanía.
Na rolda de prensa expuxemos as seguintes reivindicacións:
O escenario actual é dun absoluto "caos organizativo" nos centros de traballo:
- Ordes contraditorias e cambios continuos nas directrices de traballo.
- Falta absoluta de coordinación entre a Dirección Xeral e os representantes do persoal, excluídos de toda negociación.
- Reorganización caótica do persoal, con edificios saturados mentres outros permanecen infrautilizados.
- Desmantelamento de áreas fundamentais, especialmente as dedicadas á execución das resolucións xudiciais.
Esta situación xa está a producir consecuencias moi graves:
- Incremento histórico dos atrasos, con procedementos que poden alongarse ata un 50 % máis e xuízos sinalados, nalgúns partidos xudiciais, a tres anos vista.
- Sobrecarga de traballo insostible para o persoal, cun aumento sen precedentes das baixas por incapacidade temporal.
- Funcionarios e funcionarias que prolongan diariamente a súa xornada sen ningún tipo de compensación para intentar sacar adiante o traballo.
- Deterioro da atención á cidadanía e perda da tutela xudicial efectiva.
Os cinco sindicatos sinalamos directamente á Dirección Xeral de Xustiza como responsable política desta "implantación improvisada" e esiximos a dimisión inmediata do Director Xeral de Xustiza pola súa incompetencia e pola súa incapacidade para xestionar esta reforma.
- A ausencia total de diálogo social.
- O consentimento de actuacións contrarias á legalidade, permitindo a realización de funcións que non corresponden aos corpos afectados, a inaplicación de normativa estatal e a asignación de tarefas de Violencia sobre a Muller a persoal que carece do código correspondente na RPT.
Para reverter esta situación, os representantes sindicais esiximos:
- Ampliación real das relacións de postos de traballo (RPT).
- Cobertura inmediata das vacantes e baixas mediante interinos, ou substitucións e nomeamento urxente de reforzos.
- Creación de equipos de traballo estruturais que garantan a especialización e eviten rotacións arbitrarias.
- Respecto estrito á legalidade e fin das instrucións que vulneran a normativa vixente.
- Implantación dun sistema informático moderno, operativo e sen incidencias.
- Formación especializada e recuperación dos programas presenciais de formación.
- Implantación efectiva do teletraballo, dereito xa recoñecido legalmente ao persoal da Administración de Xustiza.
En Galicia, a chamada Lei de Eficiencia converteuse nunha auténtica Lei de Deficiencia.
- Deficiencia en recursos humanos.
- Deficiencia en medios tecnolóxicos.
- Deficiencia organizativa.·
- Deficiencia en diálogo social.
Por todo iso, os sindicatos SPJ-USO, STAJ, UGT, CSIF e CCOO esiximos a dimisión inmediata do Director Xeral de Xustiza. Esta esixencia e a nosa denuncia foi publicada o mesmo día 18 en diversos medios como RNE, CADENA SER, ONDA CERO, COPE, FARO DE VIGO E A AXENCIA EUROPA PRESS, entre outros.